A LA GUETA L’AYALGA¿Qué ye?
Esti tipu d’actividá ye cenciellamente una páxina web na que se fain una riestra d’entrugues y se da un llistáu de direiciones na REDE INTERNET nes que los escolinos tienen que dir a la gueta de les respuestes. A lo cabero de la xera propónse una SUPER-ENTRUGA, que tien la carauterística de que la respuesta nun apaez direutamente nes direiciones apurríes primero, y que pa dar cola so contestación hai que facer un llabor d’afondamientu nos trabayos de gueta d’información. Esti tipu d’actividaes son una estratexa valoratible p’alquirir información arreyada a un tema y prauticar procedimientos rellacionaos coles TIC y col accesu a la información que nos ufierta la REDE. Ente otres coses permite meyorar la comprensión llectora de los escolinos y l’aprendizaxe de téuniques de gueta d’información n’Internet.
Diseñu y cadarma d’una actividad “ A la gueta l’ayalga”
Los pasos a siguir podemos resumilos en:
Diseñu y cadarma d’una actividad “ A la gueta l’ayalga”
Los pasos a siguir podemos resumilos en:
- Identificar una idega o conceutu que queremos trabayar.
- Dir a la gueta de los sitios web que caltienen información d’esti conceutu.
- Ellaborar entrugues que los escolinos tienen que retrucar dempués de buscar información.
- Facer una fueya de trabayu en formatu html que tenemos qu’asitiar nun servidor web o nos discos duros de los ordenadores de los escolinos.
Esta fueya web ellaborarémosla de manera perfácil valiéndonos d’un xenerador on-line que dempués presentaremos.
La fueya ha de tener estes estayes:
1.- Entamu: Nesti primer apartáu damos a los escolinos la información d’aniciu, na que fairemos una pequeña descripción de les xeres que tienen que facer.
2.-Entrugues: Fairemos un llistáu d’entrugues que tienen que contestar acordies cola estaya a la que vaya dirixida l’actividá. Les entrugues puen ser:
- Entrugues direutes nel casu d’escolinos de Primaria, sacaes direutamente de les fueyes web que tienen que consultar. Precuraremos que se correspuendan una entruga con cada direición web propuesta, p’aseguranos que les visiten toes.
- Entrugues más complexes pa los escolinos de secundaria, que requieran: llectura comprensiva de la información, l’analís de la información, organización de la mesma, comparación… Si plantegamos pequeñes actividades, tienen que poder facese con cierta rapidez: lleer un mapa, facer un cálculu, solucionar un problema propuestu, escoyer ente diferentes opciones, ellaborar hipótesis cola desplicación de les causes d’un fechu…
3.- Recursos: consisten nuna llista de sitios Web que’l profesor tien localizaos p’ayudar a los estudiantes a resolver les entrugues propuestes. Hai que facer poro, una esbilla de páxines web enantes de la ellaboración de l’actividá na que s’afitarán les entrugues a facer, cola fin de llibrase d’una navegación al debalu.
P’allanar el llabor de los escolinos más pequeños suel resultar bien, poner les direiciones web xusto dempués de la entruga.
4.- La super-entruga: Ésta encamiéntase pa los escolinos de Secundaria. Trátase d’enxertar una entruga postrera na que la respuesta nun te presente de manera direuta en nenguna de les páxines ufiertaes, sinon que remana de les respuestes de les entrugues previes. Pue empobinase esta SUPER-ENTRUGA a cuestiones nes qu’intervenga la opinión personal de los escolinos.
5.- Evaluación: Nesti apartáu hai que dexar bien claro cómo vamos evaluar el trabayu de los escolinos, en función de los aciertos nes entrugues; tamién pue ser valoratible la presentación de los trabayos finales. Como xera final pue facese una correición conxunta p’ayudar a resolver les duldes de los que nun atoparon les respuestes amañoses a les entrugues propuestes.
6.- Créditos: Llistáu de fuentes que se citen o empleguen na actividá, y autoría de l’actividá.
La xente esperto en diseñu de xeres d’esta triba aveza a dar conseyos como los que van darréu:
- Identificar tema de l’actividá.
- Precurar que les entrugues provoquen pensamientu y reflexón. Nun too tien que ser “copiar y apegar” .
- Colos neños de Primaria nun incluyir más de cinco enllaces web.
- Fixar un tiempu másimu d’una sesión pa l’actividá, polo tanto, dexar el númberu d’entrugues en cinco más la super-entruga.
- Comprebar de xemes en cuando que los enllaces que proponemos nun morrieron, cosa que suel pasar n’Internet.
EXEMPLOS DE WEBQUEST:
Pa que seya más llevadora la xera de facer una webquest lo meyor ye emplegar un xenerador, como'l del enllace que va darréu:
